پٹیل ہسپتال کی جانب سے ورلڈ کینسر ڈے پر آگاہی واک اور سیشن کا انعقاد

 

کراچی: پٹیل ہسپتال نے ورلڈ کینسر ڈے کے موقع پر عوام میں شعور اجاگر کرنے کے لیے ایک آگاہی واک اور معلوماتی سیشن کا انعقاد کیا۔ اس تقریب کا مقصد کینسر جیسے موذی مرض کے بارے میں آگاہی فراہم کرنا اور اس کے بروقت علاج کی اہمیت کو اجاگر کرنا تھا۔
آگاہی سیشن میں ماہرینِ صحت کے علاوہ عوام کی بڑی تعداد نے شرکت کی۔ اس موقع پر کنسلٹنٹ میڈیکل آنکالوجسٹ ڈاکٹر مہوش شیخ نے کینسر کی ابتدائی تشخیص، علاج اور اسکریننگ کے حوالے سے قیمتی معلومات فراہم کیں۔ انہوں نے اس بات پر زور دیا کہ اگر کینسر کی بروقت تشخیص ہو جائے تو اس کا علاج ممکن ہے۔
پٹیل ہسپتال کے ڈپٹی میڈیکل ڈائریکٹر کا کہنا تھا کہ کینسر کے بارے میں عوام میں معلومات کی کمی ہے، جس کی وجہ سے اکثر مریض بروقت علاج سے محروم رہ جاتے ہیں۔ ان کا کہنا تھا کہ اس بیماری کے بارے میں آگاہی ہی واحد ذریعہ ہے جو لوگوں کو بر وقت تشخیص اور علاج کے لیے راغب کر سکتا ہے۔ اس موقع پر ڈائریکٹر کمیونیکیشن اینڈ ریسورس ڈیولپمنٹ، فرحان اسدی نے بھی اظہارِ خیال کرتے ہوئے کہا کہ اس آگاہی واک کا بنیادی مقصد عوام کو کینسر جیسے مہلک مرض کے بارے میں ضروری معلومات فراہم کرنا تھا۔ انہوں نے مزید کہا کہ پٹیل ہسپتال اس طرح کے اقدامات پر مسلسل کام کر رہا ہے تاکہ زیادہ سے زیادہ لوگوں تک آگاہی پہنچائی جا سکے۔
پٹیل ہسپتال کی جانب سے ایک آگاہی واک کا بھی انعقاد کیا گیا، جس میں ڈاکٹروں، طبی ماہرین اور شہریوں نے بھرپور شرکت کی۔ واک کا مقصد کینسر سے متعلق درست معلومات کو عام کرنا اور عوام کو اس بیماری کے تدارک کے لیے ضروری اقدامات سے آگاہ کرنا تھا۔
تقریب کے اختتام پر شرکاء میں سرٹیفکیٹس تقسیم کیے گئے تاکہ ان کی حوصلہ افزائی کی جا سکے اور صحت کے فروغ میں ان کے کردار کو سراہا جا سکے۔ پٹیل ہسپتال کی انتظامیہ نے اس موقع پر اس عزم کا اظہار کیا کہ وہ مستقبل میں بھی ایسے آگاہی سیشنز کا انعقاد جاری رکھیں گے تاکہ عوام کو صحت مند طرزِ زندگی اپنانے اور مہلک بیماریوں سے بچاؤ کے بارے میں معلومات فراہم کی جا سکیں۔ پٹیل ہسپتال کی انتظامیہ کا کہنا تھا کہ کینسر سے متعلق آگاہی اور اس کا بروقت علاج ہی اس بیماری سے بچاؤ کا بہترین طریقہ ہے، اور اس طرح کے سیشنز سے، عوام میں صحت سے متعلق شعور بیدار کرنے میں مدد ملتی ہے ۔