پشاور۔صوبائی دارلحکومت پشاور میں ضلعی انتظامیہ کا گرانفروشوں کے خلاف کریک ڈاؤن۔ ایک ہفتے کے دوران 1248 کاروباری مراکز کا معائنہ۔ 137 دکاندار گرفتار، 641 کو وارننگ۔
صوبائی حکومت کے احکامات کی روشنی میں ضلعی انتظامیہ پشاور نےایک ہفتے کے دوران مختلف علاقوں میں کارروائی کرتے ہوئے 1248 کاروباری مراکز کا معائنہ کرتے ہوئے گرانفروشی، کم وزن روٹی فروخت کرنے اور سرکاری نرخ نامے کی عدم موجودگی پربیشتر دکانداروں کو گرفتار کر لیا۔ اس حوالے سے ضلعی انتظامیہ پشاور نے یونیورسٹی روڈ، ، چارسدہ روڈ، جی ٹی روڈ، دلہ زاک روڈ، سرکلر روڈ، اندرون شہر بازاروں، حیات آباداور دیگر علاقوں میں 1248 کاروباری مراکز کا معائنہ کیا۔کارروائیوں کے دوران گرانفروشی، صفائی ناقص صورتحال ، کم وزن روٹی اور سرکاری نرخ نامے کی عدم موجودگی پر 137 دکانداروں کو گرفتارکیا گیا جبکہ 641 دکانداروں کو مزید بہتری کے حوالے سے وارننگ دی گئی۔ان گرفتار دکانداروں میں قصاب، نانبائی، سبزی و پھل فروش اور دیگر شامل ہیں۔ ان گرفتار دکانداروں کے خلاف قانونی کارروائی عمل میں لائی جائے گی۔ڈپٹی کمشنر پشاور سرمد سلیم اکرم کے مطابق صوبائی دارلحکومت میں انتظامی افسران روزانہ کی بنیاد پر سبزی و پھل منڈیوں میں سرکاری نرخ نامہ جاری کرتے ہیں اور بعد میں پشاور بھر میں سرکاری نرخ ناموں پر عمل درآمد کو یقینی بنایا جاتا ہے۔اس حوالے سے انتظامی افسران کو پشاور بھر میں بازاروں کا مسلسل معائنہ کرنے کا حکم دیا ہے اور گرانفروشی پر قانونی کارروائی کی ہدایت کی ہے۔