اقوام متحدہ کی جنرل اسمبلی نے پاکستان کی طرف سے تجویز کردہ چار قراردادوں کی منظوری دی جن کا مقصد جوہری ہتھیاروں کے پھیلاؤ کو روکنا اور عالمی سلامتی کو مضبوط بنانا ہے۔
عالمی خبر رساں ادارے کے مطابق ان میں سے دو قراردادیں متفقہ طور پر منظور کی گئیں جب کہ دیگر دو کو اکثریتی حمایت حاصل ہے۔
یہ اقوام متحدہ کی جنرل اسمبلی میں پاکستان کی بڑی کامیابی ہے۔
ان قراردادوں کی منظوری علاقائی امن اور عالمی استحکام کو فروغ دینے اور دیگر اہم سکیورٹی امور پر پاکستان کے موقف کے لیے عالمی برادری کی وسیع حمایت کی عکاسی کرتی ہے۔
پاکستان کی طرف سے پیش کی گئی پہلی دو قراردادیں علاقائی اور ذیلی علاقائی تناظر میں جوہری تخفیف اور اعتماد سازی کے اقدامات پر تھیں جنہیں متفقہ طور پر منظور کیا گیا۔ 193 رکن ممالک میں سے 186 نے تیسری قرارداد "علاقائی اور ذیلی علاقائی سطح پر روایتی ہتھیاروں کے کنٹرول” کے حق میں ووٹ دیا۔ اس تجویز کی مخالفت کرنے والوں میں بھارت بھی شامل تھا۔