سوات ضلع میں گورنمنٹ گرلز ڈگری کالج خوازہ خیلہ کی سیکڑوں طالبات نے گرلز کالج کی اراضی پر بوائز کالج کی تعمیر کے خلاف احتجاجی مظاہرہ کیا اور حکومت سے فیصلہ واپس لینے کا مطالبہ کیا۔ سیکڑوں طالبات نے کالج کے احاطے میں آگ جلاکر شدید احتجاج کیا۔
مظاہرین طالبات نے پلے کارڈز اٹھارکھے تھے اور شدید نعرے لگا رہی تھیں۔
مظاہرین طالبات کا کہنا تھا کہ 15 سال تک ہمارا کالج بند رہااور جب ہم اپنی عمارت میں آئے اصر تعلیمی سلسلہ شروع کیا تو چند ماہ بعد ہی عمارت میں آگ لگ گئی۔
آج ہم سیکڑوں طالبات خیموں میں بیٹھ کر تعلیم حاصل کرنے پر مجبور ہیں لیکن حکومت ہماری عمارت کی دوبارہ تعمیر میں سنجیدہ نہیں۔
طالبات کاکہناتھاکہ صوبائی حکومت نے ہمارے گرلز کالج کی اراضی پر بوائز کالج کی تعمیر کی منظوری دی ہے لیکن ہمیں یہ ظالمانہ فیصلہ کسی صورت قبول نہیں۔
طالبات نے حکومت سے جلنے والی گرلز کالج کی عمارت کی فوری تعمیر اور بوائز کالج کی عمارت کا فیصلہ واپس لینے کا مطالبہ کیا اور واضح کیا کہ اگر ہمارے مطالبات کوتسلیم نہ کیاگیا تو آج کالج کے احاطے میں ہم احتجاج کررہے ہیں لیکن آئندہ احتجاج پھر سڑکوں پر ہوگا اور نامعلوم مدت تک کے لئے دھرنادیا جائے گا۔