اسلام آباد-10 اپریل (اے بی سی):چین پاکستان اقتصادی راہداری (سی پیک) کے تحت بلوچستان میں جاری نو بڑے سڑک منصوبوں پر مالی سال 2022-23 سے 2025-26 کے دوران پبلک سیکٹر ڈویلپمنٹ پروگرام (پی ایس ڈی پی) کے تحت مختص 191.67 ارب روپے میں سے اب تک 85.49 ارب روپے خرچ کیے جا چکے ہیں۔ ویلتھ پاکستان کو دستیاب ایک دستاویز کے مطابق یہ منصوبے بلوچستان کے مغربی حصے میں جاری ہیں۔خضدار-کچلاک این-25 (330 کلومیٹر) منصوبہ سب سے بڑا ہے جس کے لیے 60.6 ارب روپے مختص کیے گئے جبکہ اب تک 28.98 ارب روپے خرچ ہو چکے ہیں۔
اسی طرح کراچی-کرارو اور وڈھ-خضدار این-25 (273 کلومیٹر) اور کرارو-وڈھ اور کچلاک-چمن این-25 (187 کلومیٹر) منصوبوں کے لیے 33، 33 ارب روپے مختص کیے گئے جن پر بالترتیب 8.69 ارب روپے اور 7.67 ارب روپے خرچ کیے جا چکے ہیں۔آواران-نال ایم-8 (168 کلومیٹر) سیکشن نمایاں پیش رفت دکھا رہا ہے جہاں 23.03 ارب روپے کی لاگت میں سے 19.01 ارب روپے خرچ ہو چکے ہیں جس کے باعث یہ خرچ کے لحاظ سے سب سے آگے منصوبوں میں شامل ہے۔
دیگر جاری منصوبوں میں ہوشاب-آواران ایم-8 (146 کلومیٹر) شامل ہے جس پر 11.29 ارب روپے میں سے 5.25 ارب روپے خرچ کیے جا چکے ہیں جبکہ نوکنڈی-مشکیل (103 کلومیٹر) پر 7.36 ارب روپے میں سے 4.85 ارب روپے خرچ ہوئے ہیں۔ اسی طرح کوئٹہ ویسٹرن بائی پاس این-25 (22.7 کلومیٹر) پر 5.91 ارب روپے میں سے 3.27 ارب روپے خرچ کیے گئے ہیں۔اسی طرح بسیمہ-خضدار این-30 (106 کلومیٹر) منصوبے پر 5.90 ارب روپے میں سے 3.66 ارب روپے خرچ کیے جا چکے ہیں جبکہ ژوب-کچلاک این-50 (298 کلومیٹر) سیکشن پر 11.58 ارب روپے میں سے 4.11 ارب روپے استعمال ہو چکے ہیں۔
یہ منصوبے بلوچستان میں رابطہ سازی کو بہتر بنانے کے لیے نہایت اہم ہیں، خصوصاً مغربی روٹ کے ساتھ جو سی پیک کا ایک کلیدی حصہ ہے۔بہتر سڑک نیٹ ورک سے تجارت کے فروغ، سفری وقت میں کمی اور دور دراز علاقوں کے معاشی انضمام میں مدد ملنے کی توقع ہے۔