خیبرپختونخوا کے شہر ڈیرہ اسماعیل خان میں ایک نجی آئل اینڈ گیس کمپنی کے کیمپ آفس پر نامعلوم مسلح افراد کے حملے میں ایک شخص جاں بحق اور 12 زخمی ہوگئے۔ ریسکیو 1122 کے ترجمان بلال فیضی نے ایک شہری کے جاں بحق اور دیگر کے زخمی ہونے کی تصدیق کی۔ انہوں نے کہا کہ یہ واقعہ درہ زنڈا کے علاقے میں پیش آیا۔ بلال فیضی نے بتایا کہ زخمیوں کو طبی امداد کے لیے ڈسٹرکٹ ہیڈ کوارٹر ہسپتال ڈیرہ اسماعیل خان منتقل کر دیا گیا ہے، انہوں نے مزید کہا کہ زخمیوں میں سے 2 کی حالت تشویشناک ہے۔ واقعے کی اطلاع ملتے ہی پولیس کی بھاری نفری علاقے میں پہنچ گئی اور سرچ آپریشن شروع کردیا۔