کوآرڈینیر جنرل کامسٹیک پروفیسرڈاکٹر محمد اقبال چوہدری اور پروفیسرڈاکٹر معصوم یاسین زئی سابقہ ریکٹر انٹرنیشنل اسلامک یونیورسٹی کی وفاقی اردو یونیورسٹی اسلام آباد تشریف آوری

وائس چانسلر وفاقی اردو یونیورسٹی برائے فنون سائنس و ٹیکنالوجی پروفیسرڈاکٹر ضابطہ خان شنواری کی خصوصی دعوت پر معروف ماہر تعلیم پروفیسرڈاکٹر محمد اقبال چوہدری( مصطفٰی پرائز۔ ہلال امتیاز۔ ستارہ امتیاز ) کوآرڈینیر جنرل کامسٹیک اور پروفیسرڈاکٹر معصوم یاسین زئی (ستارہ امتیاز ) سابق ریکٹر انٹرنیشنل اسلامک یونیورسٹی، وفاقی اردو یونیورسٹی اسلام آباد تشریف لائے۔ اس موقع پر وفاقی اردو یونیورسٹی اسلام آباد میں ایک اجلاس منعقد کیا گیا جس میں وائس چانسلر پروفیسر ڈاکٹر ضابطہ خان شنواری اور اردو یونیورسٹی اسلام آباد کے تمام صدور شعبہ جات نے شرکت کی۔ پروفیسرڈاکٹر محمد اقبال چوہدری نے شرکاء کو بتایا کہ انہوں نے وفاقی اردو یونیورسٹی کو ابتدائی مراحل سے بنتے ہوئے دیکھا ہے اور اس بات پر مسرت کا اظہار کیا کہ آج وفاقی اردو یونیورسٹی کو اسلام آباد کے سرسبز علاقے میں ایک شاندار بلڈنگ اور بہترین قیادت میسر آئی ہے۔ وفاقی اردو یونیورسٹی سائنس و ٹیکنالوجی کی ترویج میں بہترین خدمات انجام دے رہی ہے۔ عالمی سطح پر اور اسلامی دنیا میں بحیثیت پاکستانی ہماری پہچان ہماری تعلیم سے ہی ممکن ہے۔ دیگر ممالک ہمیں بہترین مسلمان اور بہترین انسان سمجھتے ہیں اور ہمیں اپنا یہ تشخص تعلیم کے ذریعے برقرار رکھنا ہے۔ تعلیم میں جدت اور بین الاقوامی سطح پر ہونے والی تبدیلیوں کو اپنا کر ہم کامیاب قوم بن سکتے ہیں۔ پروفیسرڈاکٹر معصوم یاسین زئی نے شرکاء سے خطاب کرتے ہوئے کہا کہ پاکستان اس وقت انتہائی مشکل دور سے گزر رہا ہے اور جامعات مالی اعتبار سے پریشانی کا شکار ہیں لیکن سب سے اہم سوال یہ ہے کہ ہمیں اس وقت کیا کرنے کی ضرورت ہے۔ کسی بھی ملک کی معیشت ٹھیک نہیں ہو سکتی جب تک اس کی درآمدات اور برآمدات میں توازن پیدا نہیں ہوتا اور یہ توازن ہم اپنی برآمدات بڑھا کر کر سکتے ہیں اور یہ کردار ہماری جامعات ادا کر سکتی ہیں۔ اگر ہم طلباء کو صرف ڈگری دینے کے بجائے انٹرپرینیورشپ سکھائیں۔ آج دنیا کو ڈگری سے زیادہ علم و ہنر کی ضرورت ہے۔ اگر ہم اپنے آپ کو دنیا کے ساتھ چلانا چاہتے ہیں تو ہمیں دنیا کے ساتھ ہم قدم چلنا ہوگا۔ اس کے لیئے ضروری ہے کہ ہمارے طلباء نوکری کے چکر سے نکل کر انٹرپرینیور بنیں اور دنیا کو تسخیر کریں۔ تقریب کے اختتام پر وائس چانسلر پروفیسر ڈاکٹر ضابطہ خان شنواری نے یونیورسٹی آمد اور اپنے علم اور تجربات پر مبنی قیمتی خیالات کے اظہار پر معزز مہمانان گرامی کا شکریہ ادا کیا اور مستقبل میں بھی اس طرح کے پروگرام منعقد کرنے کے عزم کا اظہار کیا جس سے اساتذہ کرام اور طلباء مستفید ہوں۔