اسلام آباد۔30جنوری (اے پی پی):چینی کان کنی انجینئرنگ اور آلات ساز کمپنی جیاوزو کری ایشن ہیوی انڈسٹری کمپنی لمیٹڈ کے ڈائریکٹر مارکیٹنگ پلاننگ من زیہنگ نے معدنیات کے شعبے میں پاکستان اور چین کے درمیان تعاون کو مزید گہرا کرنے کی گنجائش پر زور دیا ہے۔اسلام آباد میں منعقدہ پاک۔چین معدنی تعاون فورم کے موقع پر ویلتھ پاکستان سے گفتگو کرتے ہوئے کمپنی کے ڈائریکٹر مارکیٹنگ پلاننگ من زیہنگ نے کہا کہ پاکستان کے غیر استعمال شدہ معدنی وسائل اور جدید کان کنی ٹیکنالوجیز کی بڑھتی ہوئی ضرورت طویل المدتی دوطرفہ شراکت داری کے لئے مضبوط بنیاد فراہم کرتی ہے۔انہوں نے کہا کہ پاکستانی اور چینی کمپنیوں کے درمیان تعاون کان کنی کے عمل میں استعداد، تحفظ اور پیداوار میں بہتری لا سکتا ہے، خصوصاً ایسے وقت میں جب پاکستان اپنی معدنی صنعت کو معاشی ترقی کا ایک اہم محرک بنانے کی کوشش کر رہا ہے۔
ان کا کہنا تھا کہ پاکستان کے پاس وسیع معدنی وسائل موجود ہیں جبکہ چینی کمپنیوں نے کان کنی انجینئرنگ اور آلات کے شعبے میں قابلِ قدر تجربہ اور تکنیکی صلاحیت حاصل کی ہے اور یہ امتزاج باہمی فائدے کے منصوبوں کے مواقع پیدا کرتا ہے۔انہوں نے بتایا کہ چینی کمپنیاں کئی دہائیوں سے پاکستان میں موجود ہیں، جو دونوں ممالک کے درمیان گہرے معاشی تعلقات کی عکاسی کرتا ہے۔ انہوں نے کہا کہ ان کی کمپنی گزشتہ 20 برس سے پاکستان میں سرگرم ہے اور کراچی میں قائم مقامی دفتر کے ذریعے صنعتی اور توانائی سے متعلق منصوبوں میں حصہ لے رہی ہے۔انہوں نے کہا کہ مستقبل میں تعاون کا دائرہ کار تانبے، سونے اور کوئلے سمیت مختلف معدنیات تک پھیل سکتا ہے جہاں پیداوار اور پروسیسنگ کو بہتر بنانے کے لئے جدید انجینئرنگ حل درکار ہیں۔ انہوں نے مزید کہا کہ پاکستان میں کام کرنے والی چینی کمپنیاں اکثر مقامی افرادی قوت کو شامل کرتی ہیں جس سے تکنیکی تعاون اور علم کے تبادلے کو فروغ ملتا ہے۔
دوطرفہ تعلقات کے وسیع تناظر کی نشاندہی کرتے ہوئے من زیہنگ نے ویلتھ پاکستان کو بتایا کہ کان کنی کے شعبے میں تعاون پاکستان اور چین کے صنعتی ترقی اور سرمایہ کاری پر مبنی نمو کے مشترکہ مفادات سے ہم آہنگ ہے۔ ان کا کہنا تھا کہ پاکستانی حکومت معیشت کو سہارا دینے کے لئے معدنی وسائل کی ترقی کی اہمیت کو تسلیم کرتی ہے جس سے تجربہ کار بین الاقوامی شراکت داروں کے ساتھ تعاون کی گنجائش پیدا ہوتی ہے۔انہوں نے کہا کہ پاکستان کے تانبے، لوہے، سیسے، زنک، ایلومینیم اور قیمتی پتھروں کے ذخائر طویل المدتی سرمایہ کاری کے امکانات رکھتے ہیں اور اس امید کا اظہار کیا کہ پاکستانی اور چینی فریقین کے درمیان مسلسل روابط اس صلاحیت کو بروئے کار لانے میں مدد دے سکتے ہیں جبکہ دونوں ممالک کے معاشی تعلقات مزید مضبوط ہوں گے۔