کینیڈا نے لاکھوں غیر قانونی تارکین وطن کو شہریت دینے کا فیصلہ کیا ہے۔
خبر رساں ادارے کے مطابق کینیڈا کے وفاقی وزیر امیگریشن مارک ملر نے اعلان کیا ہے کہ کینیڈا میں قانونی دستاویزات کے بغیر رہنے والے افراد کو مستقل رہائشی کارڈ جاری کیا جائے گا اور اس طرح انہیں قانونی حیثیت مل جائے گی۔
اس فیصلے سے لاکھوں پناہ گزینوں کو فائدہ پہنچے گا، جن میں وہ لوگ بھی شامل ہیں جن کے ورک پرمٹ یا بین الاقوامی طلبہ کے ویزوں کی میعاد ختم ہو چکی ہے۔
وزیر امیگریشن کا کہنا ہے کہ غیر قانونی تارکین وطن کو قانونی حیثیت دینے کا فیصلہ 2025 تک 500,000 افراد کو کینیڈا منتقل کرنے کے منصوبے کا حصہ ہے۔
واضح رہے کہ کینیڈا میں 300,000 سے 600,000 افراد قانونی دستاویزات کے بغیر مقیم ہیں اور ان میں غیر قانونی تارکین وطن بھی شامل ہیں جنہیں ملک بدری کے احکامات جاری کیے گئے ہیں۔
وزیر امیگریشن کے مطابق کینیڈین حکومت کے نئے فیصلے کی تفصیلات جلد جاری کی جائیں گی۔