سوات(بیورورپورٹ)صوبائی وزیر لائیو سٹاک، فشریز و کوآپریٹیو فضل حکیم خان یوسفزئی کے زیر صدارت یونیورسٹی آف ویٹرنری اینڈ اینیمل سائنسز سوات کے حوالے سے اہم اجلاس ان کے دفتر پشاور میں منعقد ہوا اجلاس میں ممبر صوبائی اسمبلی سلطان روم، وائس چانسلر داؤد جان، اسسٹنٹ رجسٹرار ڈاکٹر خالد خان، ایڈوائزر فنانس افضل خان، پراجیکٹ ڈائریکٹر خسرو کلیم، سیکرٹری سی اینڈ ڈبلیو اسرار خان اور دیگر متعلقہ افسران نے شرکت کی اس موقع پر وائس چانسلر داؤد جان نے صوبائی وزیر فضل حکیم خان یوسفزئی کو یونیورسٹی پر اب تک کی پیش رفت، فنڈز فراہمی، تعلیمی اور اکیڈمک پراگریس کے حوالے سے بریفنگ دی جبکہ اس کے علاؤہ طلبہ کے مشکلات کے حوالے سے بھی انہیں آگاہ کیا صوبائی وزیر فضل حکیم خان یوسفزئی نے یقین دہانی کرائی کہ یونیورسٹی آف ویٹرنری اینڈ اینیمل سائنسز سوات کے طلبہ کے جتنے بھی مسائل ہیں انہیں ترجیحی بنیادوں پر حل کئے جائیں گے انہوں نے متعلقہ حکام کو ہدایت جاری کرتے ہوئے کہا کہ یونیورسٹی پر کام تیز کیا جائے اور مقررہ وقت پر مکمل کیا جائے تاکہ طلبہ کو مشکلات نہ ہو اور اپنی پڑھائی احسن طریقے سے مکمل کرسکے انہوں نے کہا کہ یونیورسٹی آف ویٹرنری اینڈ اینیمل سائنسز سوات کے طلبہ کو انکا بنیادی حق صوبائی حکومت کی اولین ترجیح ہے صوبائی وزیر نے واضح کیا کہ اصل مقصد طلبا و طالبات کو جدید تعلیم و تحقیق کے مواقع فراہم کرنا ہے جس کے لیے تدریسی و تحقیقی سرگرمیوں کا اجراء ناگزیر ہے۔ انہوں نے یونیورسٹی کی مستقل عمارت کی تعمیر پر کام تیز کرنے کی بھی سختی سے ہدایت کی اور کہا ہے کہ اس مقصد کے لیے درکار وسائل کی فراہمی یقینی بنائے۔ صوبائی وزیر فضل حکیم خان یوسفزئی نے مذکورہ یونیورسٹی کے قیام کو اہم ضرورت قرار دیتے ہوئے کہا کہ یونیورسٹی آف ویٹرنری اینڈ اینمل سائنسز کے قیام سے نہ صرف اس شعبے میں دلچسپی لینے والے طلبا و طالبات کو معیاری تعلیم و تحقیق کی سہولت میسر آئے گی بلکہ یہ منصوبہ لائیوسٹاک اور دیگر متعلقہ شعبوں کی ترقی کیلئے بھی سنگ میل ثابت ہوگا۔