اسلام آباد۔7فروری (اے پی پی):پاکستان حکومت کی سطح پر مذاکرات اور تجارتی سہولت کاری اقدامات کے ذریعے فلپائن اور چین کو چاول کی برآمدات بڑھانے کی کوششیں تیز کر رہا ہے۔ویلتھ پاکستان کو دستیاب دستاویزات کے مطابق پاکستان اور فلپائن اس وقت حکومت سے حکومت کی بنیاد پر مفاہمت کی یادداشت (ایم او یو) پر مذاکرات کر رہے ہیں جس کے تحت پانچ سال کی مدت کے دوران سالانہ 10 لاکھ ٹن چاول فلپائن برآمد کئے جائیں گے تاکہ پاکستان کی چاول کی برآمدات میں اضافہ کیا جا سکے۔دستاویز کے مطابق پاکستان نے ایم او یو کا مسودہ شیئر کر دیا ہے جس کے جواب میں فلپائن نے متبادل مسودہ پیش کیا ہے۔
دونوں ممالک 19 تا 20 فروری کو منعقد ہونے والے دوسرے مشترکہ اقتصادی کمیشن (جے ای سی) اجلاس کے موقع پر معاہدے کو حتمی شکل دے کر دستخط کرنے کا ارادہ رکھتے ہیں۔چین کے حوالے سے دستاویز میں کہا گیا ہے کہ وزارتِ تجارت نے آزاد تجارتی معاہدے کے امکانات اور تجارتی سہولت کاری اقدامات کا جائزہ لینے کے لئے اعلیٰ سفارتی سطح پر چینی حکام سے رابطہ کیا ہے تاکہ پاکستان کی چاول کی برآمدی صلاحیت میں اضافہ کیا جا سکے۔19 جنوری کو چینی فریق کے ساتھ ایک تفصیلی اجلاس منعقد ہوا جس میں دونوں ممالک نے چین-پاکستان آزاد تجارتی معاہدے (سی پی ایف ٹی اے) کے مرحلہ اول اور مرحلہ دوم کے تحت پیشرفت کا جائزہ لیا۔
اگرچہ چین کو پاکستان کی برآمدات میں بتدریج اضافہ ہوا ہے تاہم تجارتی کارکردگی کو مزید بہتر بنانے کی گنجائش موجود ہے۔مزید مواقع سے فائدہ اٹھانے کے لئے پاکستان نے ترجیحی برآمدی اشیا، بشمول چاول، کی فہرست چین کو پیش کر دی ہے اور اضافی رعایات کی درخواست کی ہے تاکہ منڈی تک رسائی کو وسعت دی جا سکے اور دوطرفہ تجارت کو فروغ دیا جا سکے۔
برآمدات کو تیز کرنے کے لئے پاکستان نے عبوری سہولت کاری اقدامات بھی تجویز کئے ہیں جن میں پاکستانی چاول پر عائد موجودہ ایک فیصد درآمدی ڈیوٹی کی معافی، 20-2019 کی طرز پر خصوصی درآمدی کوٹہ اور چینی سرکاری اداروں خصوصاً چائنا آئل اینڈ فوڈ اسٹفز کارپوریشن (کوفکو) کے ساتھ طویل مدتی خریداری شراکت داری شامل ہے تاکہ سپلائی چین مضبوط ہو اور پاکستانی سپلائرز کو پائیدار مواقع فراہم کئے جا سکیں۔