اسلام آباد۔9فروری (اے پی پی):کراچی کو یومیہ 260 ملین گیلن اضافی پانی فراہم کرنے کے لیے تیار کیا جانے والا کے فور واٹر سپلائی منصوبہ تعمیر کے جدید مرحلے میں داخل ہو چکا ہے اور اس کی تکمیل دسمبر 2026 تک متوقع ہے۔ویلتھ پاکستان کو دستیاب دستاویزات کے مطابق کے فور منصوبہ وفاقی حکومت اور حکومتِ سندھ کے مشترکہ تعاون سے مکمل کیا جا رہا ہے۔مالی سال 26-2025 کے لیے وفاقی حکومت نے ابتدائی طور پر 3.209 ارب روپے مختص کیے تھے، جنہیں بعد ازاں بڑھا کر 8.209 ارب روپے کر دیا گیا۔
وزارتِ آبی وسائل منصوبے کو مقررہ وقت پر مکمل کرنے کے لیے اندرونی بچت کے ذریعے مزید فنڈز بڑھانے کے امکانات کا بھی جائزہ لے رہی ہے۔دوسری جانب نظرِ ثانی شدہ پی سی ون کے تحت حکومتِ سندھ کا حصہ 8.503 ارب روپے مقرر ہے۔حکام دوسرے نظرِ ثانی شدہ پی سی ون پر بھی کام کر رہے ہیں جو اس وقت وزارتِ آبی وسائل میں زیرِ جائزہ ہے۔ منظوری کے بعد اسے وزارتِ منصوبہ بندی، ترقی اور خصوصی اقدامات کو بھیجا جائے گا تاکہ ایکنیک سے حتمی منظوری حاصل کی جا سکے۔
منصوبے کی موثر آزمائش اور کمیشننگ کے لیے 50 میگاواٹ بجلی کی مخصوص فراہمی بھی درکار ہے۔ سندھ ٹرانسمیشن اینڈ ڈسپیچ کمپنی اس مقصد کے لیے علیحدہ بجلی لائن تیار کر رہی ہے۔ حکام کے مطابق بجلی کے نظام کو منصوبے کے شیڈول کے مطابق ہم آہنگ کرنا آپریشنل تیاری کے لیے نہایت اہم ہے۔کے فور منصوبہ کراچی کے اہم ترین بنیادی ڈھانچے کے منصوبوں میں شمار ہوتا ہے۔
اس کی تکمیل کے بعد شہر میں پانی کی مجموعی فراہمی میں نمایاں اضافہ ہوگا اور بڑھتی ہوئی آبادی کی ضروریات پوری کرنے میں مدد ملے گی۔حکام نےمنصوبے کو بروقت مکمل کرنے کے عزم کا اعادہ کرتے ہوئے وفاقی اور صوبائی اداروں کے درمیان قریبی رابطے پر زور دیا ہے تاکہ فنڈز اور سہولیات کی فراہمی بلا تعطل جاری رہے۔